اشیاء خوردونوش میں ملاوٹ اور غیر معیاری ہونے پر فوڈ اتھارٹی کا ایکشن 3 دکانیں سیل

کوئٹہ: ڈیجیٹل نیوز اردو (ویب ڈیسک)
بلوچستان فوڈ اتھارٹی کی ناقص و ملاوٹی خوراک کے تدارک کیلئے جاری کاروائیوں کے دوران 3 ملک شاپس سربمہر جبکہ ایک قلفی کارخانہ سمیت متعدد مراکز پر جرمانہ عائد کردئیے گئے
سرکاری خبر میں بتایا گیا ہے کہ بی ایف اے ملک سیفٹی ٹیم نے اسپنی روڈ میں دودھ کے معیار کی جانچ کیلئے ملک شاپس کا معائنہ کیا، دوران انسپیکشن ٹیسٹ کردہ نمونوں میں سے 3 دکانوں کے دودھ میں خشک پاؤڈر کی وافر مقدار کی ملاوٹ کا انکشاف ہوا، جس پر تینوں مراکز کو فوری طور پر سیل کردیا گیا۔ طوغی روڈ میں فوڈ بزنس لائسنس کی عدم دستیابی اور حفظان صحت کے اصولوں کے برخلاف خوردنی اشیاء کی تیاری و فروخت پر 1 آئسکریم قلفی کارخانہ اور 2 بیکنگ یونٹس پر جرمانے عائد کیے گئے۔ بلوچستان فوڈ اتھارٹی حکام کے مطابق قلفی کارخانہ میں اجزاء ترکیبی کا کوئی ریکارڈ اور لیب ٹیسٹ موجود نہیں تھے جبکہ پروڈکشن میں ناقص، ایکسپائرڈ و غیر رجسٹرڈ شدہ اجزاء کی آمیزش کا سلسلہ جاری تھا، بیکنگ یونٹس کے پراسیسنگ اور اسٹوریج احاطوں میں صفائی کی صورتحال ابتر، ورکرز کی ذاتی صفائی، ماسک، دستانے اور ہیڈ کورز نہیں تھے جبکہ حتمی پراڈکٹس پر مینوفیکچرنگ و ایکسپائری تواریخ موجود نہیں تھیں۔اسی طرح بروری روڈ میں 3 بیکرز اور 1جنرل اسٹور کو جرمانہ کیا گیا، بیکرز کے خلاف مختلف وجوہات صفائی و اسٹوریج کے ناقص انتظامات، بارہا تنبیہ کے باوجود حتمی اشیاء پر تیاری و تاریخ تنسیخ ظاہر نہ کرنے، آلودہ بیکنگ مشینوں اور ورکرز کی ذاتی صفائی کی خراب حالت پر کارروائی کی گئی، جنرل اسٹور سے غیر معیاری و ممنوعہ کوکنگ آئل برآمد ہوا۔ علاوہ ازیں کوئٹہ شہر کے وسط میں واقع مشن روڈ اور سرکلر روڈ کے علاقوں میں اشیاء خوردونوش کے مراکز کی انسپیکشن کے دوران 2 بیکنگ یونٹس اور 1 ہوٹل پر جرمانے عائد کیے گئے، بیکنگ یونٹس میں صفائی کی صورتحال خراب، تیار اشیاء اور پروڈکشن میں استعمال کردہ اجزاء پر ایکسپائری تواریخ موجود نہیں تھیں جبکہ سپلائی کی جانے والی اشیاء کو غیر صحت بخش حالات کیں ذخیرہ کیا گیا تھا۔ ہوٹل کے خلاف کچن میں گندگی و نکاسی آب کے ناقص انتظامات سمیت ایس او پیز کی خلاف ورزی پر ایکشن لیا گیا۔